मुलांच्या एकंदर वाढीच्या आणि विकासाच्या दृष्टीने त्यांच्या वयाची सुरवातीची वर्षे अत्यंत महत्त्वाची असल्याचे दिसून येते . या काळात मुलांच्या विकासामध्ये पालकांचा सहभाग असेल तर त्याचा मुलाच्या शिक्षणावर, आरोग्यावर आणि वागणुकीवर चांगला परिणाम होऊ शकतो. ‘पॅरेंट्स अॅज अर्ली टीचर्स’ किंवा ‘पालक हेच पहिले गुरू’ हा कार्यक्रम ग्रामीण भागातल्या पूर्वप्राथमिक वयातल्या मुलांच्या पालकांकरता, विशेषत: माता पालकांसाठी आहे. या कार्यक्रमात मुलांच्या विकासाबाबत पालकांची समज तयार करण्याचे काम केले जाते. तसेच घरात आणि दैनंदिन जीवनात विविध अनुभव घेण्यास मुलांना मदत करून त्यांना शाळेत जाण्यासाठी तयार कसे करायचे यासाठी पालकांना मार्गदर्शन केले जाते. पालकांचे मुलांशी असलेले नाते दृढ करणारा हा कार्यक्रम – Gooru Learning Navigator या तंत्रज्ञानाच्या मदतीने अंमलात आणला जातो. यामधे भाषेची ओळख, संख्यांविषयीची जाणीव,,कारक विकास, लिखाणाची पूर्वतयारी, सामाजिक-भावनिक विकास तसेच वैयक्तिक निगा आणि आत्मनिर्भरता यावर भर दिला जातो. घरगुती वस्तूंच्या मदतीने आपल्या मुलाला एखाद्या संकल्पनेची ओळख कशी करून द्यावी याबद्दल मातांना मार्गदर्शन करणारी व्हिडीओ सत्रे यामध्ये आहेत. ही व्हिडीओ सत्रे मुलांच्या विकासाच्या प्रत्येक टप्प्याशी जोडलेली आहेत. सध्या साताऱ्यातील (महाराष्ट्र) एका तालुक्यात एकात्मिक बाल विकास सेवा (ICDS) या योजनेमार्फत ग्यानप्रकाश फाउंडेशन हा उपक्रम राबवतआहे.