प्रत्येक माणसात शिकण्याची उपजत क्षमता दिसून येते. शिकण्याच्या पद्धतीत आमूलाग्र बदल झाला तर प्रत्येकाला आयुष्यभर नवनवीन गोष्टी शिकण्यातला आनंद लुटता येईल. वर्गातील सगळी मुले एकाच पातळीवर आहेत असे गृहीत धरून शिकवण्यापेक्षा त्यांना आपापल्या क्षमतेनुसार शिकायला मिळाले तर ते शिकणे अधिक उपयोगाचे ठरेल. प्रत्येक मुलाला त्याच्या क्षमतेनुसार शिकवायचे असेल तर त्या दृष्टीने वर्ग प्रक्रिया ठरवाव्या लागतील. मूल कसे शिकते हे समजून घेण्यासाठी गेल्या दहा वर्षांपेक्षा अधिक काळ ग्यानप्रकाश फाऊंडेशनचा अभ्यास आणि विविध शैक्षणिक प्रयोग चालू आहेत. तसेच अनेक संस्थांच्या सहयोगाने ग्यानप्रकाश काम करत आहे. या अनुभवातूनच ‘ प्रत्येक मूल वेगळे असल्यामुळे त्याला आपापल्या गतीने शिकता यायला हवे, प्रगती करता यायला हवी’ ही संस्थेची भूमिका सिद्ध झालेली आहे. शिक्षक, पालक, शाळा, स्थानिक समुदाय आणि शिक्षणसंस्था यांना सामावून घेणारा असा हा नाविन्यपूर्ण दृष्टीकोन आहे.